Deu 14 | NdeIBE | STEP | Lingabantwana bakaJehova uNkulunkulu wenu. Lingabozisika loba liphuce amakhanda enu lizilela abafileyo,

Deuteronomy 14

Ukudla okuhlanzekileyo lokungahlanzekanga

1 Lingabantwana bakaJehova uNkulunkulu wenu. Lingabozisika loba liphuce amakhanda enu lizilela abafileyo, 2 ngoba lingabantu abangcwele kuJehova uNkulunkulu wenu. Ebantwini bonke abasemhlabeni, uJehova ulikhethile lina ukuthi libe ngabantu bakhe abaligugu.

3 Lingadli loba kuyini okunengisayo.

4 Nanzi izinyamazana elingazidla: inkomo, imvu, imbuzi, 5 umziki, impala, umziki obomvu, imbuzi yeganga, imbuzi mawa, umtshwayeli lemvu yentaba. 6 Lingadla zonke izinyamazana ezilenklagu njalo ezetshisayo. 7 Kodwa-ke kulezo ezilenklagu loba lezo ezetshisayo zilani lingadli ikamela, umvundla loba inteletsha. Zingcolile kini ngokomkhuba. 8 Ingulube layo ayihlanzekanga; lanxa ilenklagu kayetshisi. Lingabokudla inyama yazo, lingathinti lezidumbu zazo.

9 Kuzo zonke izinyamazana ezihlala emanzini, lingadla zonke lezo ezilempiko lezilamaxolo.

10 Kodwa konke lokho okungelampiko lamaxolo akumelanga likudle; kungcolile kini.

11 Lingadla loba yiphi inyoni ehlanzekileyo.

12 Kodwa lezi lingazidli: ingqungqulu, ilinqe elimnyama, 13 uhelwane olubomvu, uhelwane olumnyama, loba yiwuphi umhlobo womzwazwa 14 loba ngumhlobo bani wewabayi,

15 isikhova, umandukulo, idada lolwandle, loba lukhozi bani, 16 isikhova esincane, isikhova esikhulu, isikhova esimhlophe, 17 isikhova senkangala, ukhozi lwenhlanzi, itshayamanzi,

18 ingabuzane, lawuphi umhlobo welanda, imvenduna lolulwane.

19 Zonke izibungu eziphapha zingu-mtshitshi zingcolile kini; lingabozidla.

20 Kodwa konke okulempiko okuhlanzekileyo kudleni.

21 Lingabokudla lokhu elifumana kuzifele kodwa. Lingakunika loba ngubani owezizweni ohlezi loba kukuliphi phakathi kwamadolobho enu, yena angakudla, ulakho njalo ukuthi angathengisela omunye laye owezizweni. Kodwa lina lingabantu abangcwele kuJehova uNkulunkulu wenu. Lingapheki izinyane lembuzi ngochago lukanina.

Okwetshumi

22 Banini leqiniso ukuthi libeka eceleni lokhu okuyingxenye yetshumi yesivuno somnyaka.

23 Dlanini okwetshumi lamabele enu, iwayini elitsha lamafutha, kanye lamazibulo emihlambi yezinkomo zenu lawezimvu emehlweni kaJehova uNkulunkulu wenu endaweni azalikhethela yona ukuba ibe leBizo lakhe, ukuze lifunde ukumphakamisa uJehova uNkulunkulu wenu ngezikhathi zonke. 24 Kodwa nxa leyondawo ikhatshana kakhulu lina libusisiwe nguJehova uNkulunkulu wenu njalo lingenelisi ukuthwala okwetshumi kwenu (ngenxa yokuthi iNkosi lapho ekhethe khona ukubeka iBizo layo kukhatshana kakhulu),

25 thengisani okwetshumi kwenu ngesiliva, libe selithatha lihambe lesiliva liye endaweni leyo ezabe ikhethwe nguJehova uNkulunkulu wenu.

26 Sebenzisani isiliva lithenge ngaso loba yini elifuna ukuyithenga: izinkomo, izimvu, iwayini loba kuyini elikufunayo. Ngakho lina kanye labendlu yenu lizakudla khonapho phambi kukaJehova uNkulunkulu wenu njalo libe lokujabula.

27 Njalo lingakhohlwa abaLevi abahlala emadolobheni enu, ngoba abalaso isabelo esingesabo njalo abaphiwanga ilifa.

28 Ekupheleni kweminyaka emithathu, lethani okwetshumi kwesivuno salowomnyaka likugcine emadolobheni enu, 29 yikho kuzakuthi abaLevi (bona abangelasabelo loba ilifa elingelabo) kanye labezizweni, izintandane ezingelaboyise labafelokazi abahlala emadolobheni enu beze labo bazokudla basuthe, njalo kuze kuthi uJehova uNkulunkulu wenu alibusise kuyo yonke imisebenzi yezandla zenu.